ИРГЦ во соопштението наведува дека за време на заедничката операција на иранските воздухопловни сили и копнените сили, народните единици, Басиџ и полициските сили, „непријателски летачки објекти беа уништени“, објави иранската Прес ТВ.
„По очајните потези на САД за спасување на пилотот на соборениот борбен авион и влегувањето на летачките објекти во централните делови на земјата, непријателските летачки објекти беа уништени, а САД повторно претрпеа понижувачки пораз за време на заедничката операција на нашите сили“, соопшти Одделот за односи со јавноста на ИРГЦ.
Соопштението дојде кратко откако американскиот претседател Доналд Трамп објави на својот профил на социјалните мрежи Truth Social дека американските сили го спасиле вториот пилот на соборениот авион, кој беше исчезнат до утрово.
Во меѓувреме, портпаролот на Централната команда, Хатам ал-Анбија, обединетата команда на иранските вооружени сили, изјави дека меѓу соборените авиони бил и воен транспортен авион Ц-130, како и два хеликоптери Блек Хок, за кои рече дека биле во пламен.
Според него, „очајните обиди на непријателот да го спаси пилотот не успеале благодарение на Божјата милост, божествената промисла, како и мерките за време и заедничката операција на ИРГЦ, копнените сили, Басиџ и полицијата“.
Претходно денеска, иранската војска објави дека соборила израелски дрон во истата покраина.
Трамп претходно денеска изјави дека американските специјални сили пронашле и спасиле американски офицер кој, заедно со пилотот, се катапултирал од авион Ф-15Е што беше соборен над Иран во петокот, 3 април.
ИРГЦ ја презеде одговорноста за нападот врз американскиот авион, во кој се наоѓале двајца членови на екипажот.
Пилотот на Ф-15Е безбедно се катапултирал и бил спасен од два воени хеликоптери истиот ден, но другиот член на екипажот, офицер за системи за оружје, бил исчезнат до утрово.
© Vecer.mk, правата за текстот се на редакцијата
