Тоа е најдолгата казна досега изречена во врска со минатомесечното насилство, кое избувна низ Велика Британија откако три девојчиња беа избодени до смрт на час по танц во Саутпорт, објави Телеграф.
Томас Бирли (27) од Свинтон, во близина на Ротерам, претходно се изјаснил за виновен за подметнување пожар со намера да загрози живот, учество во насилни нереди и поседување опасно оружје - телескопска палка.
Тој е осуден на девет години затвор.
Да потсетиме дека инцидентот се случи откако маскирани бунтовници упаднаа во хотелот Холидеј Ин Експрес во Ротерам, Јужен Јоркшир, што се користел за сместување на баратели на азил. Во нередите тој ден, 4 август, беа повредени 64 полицајци.
Во судот слушнале дека Бирли бил дел од групата за време на немирите кои ги скршиле прозорците на приземјето и ја нарекле полицијата „е*ани заштитнички ѓубриња“. За време на немирите, надвор од хотелот бил запален оган, а Бирли, сликар и декоратор, бил забележан како фрла парче иверка кон него. Тој, исто така, бил виден како помага да се премести корпата за отпадоци врз огнот.
Џереми Ричардсон, судијата за изрекување на казната, рече дека „што е можно појасно“ дека Бирли „имал намера да шири порака полна со омраза, насилство и расизам“. „Се чини дека имате ставови кои немаат никаква емпатија за оние кои бараат азил во Обединетото Кралство“, рече судијата.
„Рековте дека отидете во хотел за да го изразите своето мислење. Она што го направивте беше поттикнато од објавите на социјалните мрежи. Знаевте дека ќе учествувате во насилство од расистичка толпа. Ставивте шал на лицето иако беше топол ден“, му рекол судијата.
Немирите уследија по бранот дезинформации, претежно распространети преку екстремно десничарските профили на социјалните мрежи, во врска со идентитетот на осомничениот за убиството на девојчињата во Саутпорт, за кој погрешно се тврдеше дека е барател на азил кој пристигнал во Британија со брод.
Судијата рече дека случајот на Бирли е „несомнено“ најсериозниот што тој го сретнал во врска со немирите надвор од хотелот.
© Vecer.mk, правата за текстот се на редакцијата
