Мелони им изјави на новинарите во Њујорк, за време на Генералното собрание на Обединетите нации, дека мнозинството во салата на ОН ќе презентира предлог со кој се утврдува дека признавањето на државата Палестина мора да ги исполни овие услови, пренесува италијанската агенција Нова.
„Прво е ослободување на заложниците, второ е исклучување на Хамас од која било управувачка структура во Палестина“, рече Мелони.
Таа оцени дека признавањето на Палестина, во отсуство на држава со потребен суверенитет, не го решава проблемот и не носи никакви опипливи резултати за Палестинците.
„Велат дека признавањето може да биде ефикасно средство за политички притисок и јас го разбирам тоа, но мора да разбереме кој е под притисок. Верувам дека најголемиот притисок треба да биде врз Хамас, кој ја започна војната и одбива да ги ослободи заложниците“, нагласи Мелони.
Таа додаде дека се согласува со говорот на американскиот претседател Доналд Трамп на Генералното собрание на ОН, кој претходно денес изјави дека мултилатералните тела на ОН, за да работат ефикасно и да ја подобрат својата улога во сегашниот контекст, мора да бидат способни да се справат со она што не функционира.
Мелони го покрена прашањето за реформирање на Советот за безбедност на ОН, нагласувајќи дека на ова тело му недостасува „капацитет за влијание“.
Таа рече дека не се согласува со Трамп во врска со неговата изјава за зелената енергија, која американскиот претседател ја нарече измама, тврдејќи дека обновливите извори на енергија како што се сончевата и ветерната енергија се поскапи од енергијата од фосилни горива.
Италијанската премиерка, исто така, рече дека „Европа е недвосмислена во врска со Украина“.
„Треба да соработуваме како Запад ако сакаме да донесеме дома праведен и траен мир, ни требаат и Европа и САД“, заклучи Мелони.
© Vecer.mk, правата за текстот се на редакцијата
