Германскиот министер за надворешни работи, Хајко Мас, изјави дека таканаречениот нон-пејпер не потекнува од Германија, објави германското Министерство.
Мас реагираше на пишувањето на приштинскиот весник „Коха“ дека има уште еден нон-пејпер во кој се дефинирани односите меѓу Белград и Приштина.
„Ова не доаѓа од перото на германската влада. Напротив, за време на неговата посета на Приштина и Белград минатата недела, министерот за надворешни работи Мас истакна дека Германија го поддржува дијалогот за нормализирање на односите со посредство на ЕУ и дека целта е сеопфатен договор што придонесува за регионалната стабилност“, се вели во соопштението, пренесува „Дојче веле“.
„Коха“ вчера објави дека имала увид до документ, наводно, подготвен од Германија и Франција, како заедничка иницијатива за продолжување на дијалогот, што треба да резултира со конечен договор.
Според наводниот документ, Белград и Приштина би се признале едни со други, а предвидено е создавање на автономна област во северно Косово, како и привилегиран статус на Српската православна црква.
Од друга страна, Белград ќе биде должен да не го блокира членството на Приштина во меѓународните организации.
makfax.com.mk
