Министерството за трговија во Пекинг најави итно прекинување на извозот на галиум, германиум, антимон и супертврди материјали во САД. Овие елементи се користат во технолошкиот сектор и за производство на муниција, пренесува Asia Financial.
Наредбата на Министерството, објавена во денешното соопштение, дојде еден ден откако САД ги проширија своите рестриктивни мерки против кинеската индустрија за полупроводници. Ова е трета ваква акција во последните три години, а вклучува извозни ограничувања на 140 компании, меѓу кои и производителот на опрема за чипови Наура Технолоџи Груп.
Експертите предупредија во август дека заострувањето на контролата на извозот од страна на Кина на клучните минерали потребни за производство на чипови може да предизвика глобален недостиг на полупроводници.
Од минатата година, Пекинг значително го намали извозот на галиум и германиум, два метали клучни за производство на компјутерски чипови со голема брзина.
Кина доминира во снабдувањето со двата метали, со најмалку 60% од глобалното производство на германиум и речиси 90% од глобалното производство на галиум.
© Vecer.mk, правата за текстот се на редакцијата
