Видеото на Си-Ен-Ен од Деир ал-Балах во центарот на Газа покажа преполни улици од луѓе кои се радуваат, скокаат, плескаат и веат палестински знамиња. Во позадина се слуша звук на славенички пукотници. Некои од оние кои славеа се собраа во дворот на болницата за маченици Ал Акса, која повеќе од една година ги прима жртвите од израелските напади.
„Чувство кое е неописливо, никогаш не очекувавме дека ќе дојдеме до оваа фаза, дури и сега не веруваме“, рече Ала Абу Карш, кој ја опиша веста за договорот како „многу големо изненадување за палестинскиот народ и за целиот свет.“
„Посакуваме уште многу луѓе да го слават овој момент со нас, но сега се на подобро место“, рече тој, додавајќи дека со нетрпение чека да се врати дома во северна Газа.
Видеото на Ројтерс од Кан Јунис во јужниот дел на Газа покажа импровизирана парада на пазар, каде што еден човек беше дигнат во толпата, додека други свиреа.
„По нашата душа и крв, ќе се жртвуваме за тебе, о Акса!“ тие скандираа, популарна палестинска изрека која се однесува на џамијата Ал Акса во Ерусалим.
Раселениот Палестинец Абдалах Ал-Бајсуни рече дека со нетрпение очекува да се соедини со своето семејство на северот.
„Со Бога, ние сме многу среќни што оваа криза, тага, бомбардирање и смрт што ни се случи конечно заврши и што ќе се вратиме во нашите родни места и ќе се вратиме кај нашите семејства“, рече тој. „Најголема радост е да ги видам моите браќа кои заминаа и моето семејство кое замина, кое не сум го видел повеќе од една година.“
© Vecer.mk, правата за текстот се на редакцијата
