Како одговор на оваа истрага, Комисијата за коцкање презеде акција против овие „криминални“ веб-страници.
Нелегалните онлајн казина користат Roblox, една од најпопуларните видео игри во светот, за да ги намамат децата веќе на возраст од 12 години во онлајн коцкање, откри истрагата на Sky News.
Иако овие нелиценцирани казина не се директно достапни на платформата Roblox, тие им дозволуваат на децата од сите возрасти да се најавуваат користејќи сметки на Roblox и да ги инвестираат своите виртуелни пари (Robux) на игри како слотови и блек џек.
Добивките може да се повлечат во форма на криптовалути - кои потоа може да се претворат во вистински пари.
Roblox е опишан како „дигитално игралиште“ од неговиот извршен директор и има околу 80 милиони активни корисници дневно. Оваа платформа е особено популарна меѓу децата - се проценува дека 42% од корисниците се под 12 години.
Скај њуз разговарале со американски тинејџер кој тврди дека прокоцкал околу 15 милиони Робукс (во вредност од околу 150.000 фунти). Тој почнал да ги користи овие страници кога имал само 14 години - седум години под законскиот минимум за коцкање во неговата држава.
- Мајка ми се обиде да ме спречи, но јас не застанав - рекол Роберт (името е сменето).
- Едноставно ми се допадна адреналинскиот наплив на сѐ поголеми облози - додаде тој.
Роберт тврди дека не знаел дека го крши законот.
- Мислев дека тоа е нешто што можете да го направите за да заработите дополнителни пари. Не ни знаев што е тоа коцкање.
Истрагата на Sky News се фокусирала на трите најголеми казина на Robux: BloxFlip, Bloxmoon и RBLXWild. Овие страници бележат околу 2,8 милиони посети месечно и овозможуваат коцкање во вредност од милиони фунти.
Како одговор на наодите на Sky News, Комисијата за коцкање започнала итна истрага за овие казина и им забрани пристап во Британија.
- Криминалците секогаш ќе се обидуваат да најдат нови начини за експлоатација на луѓето, вклучително и децата - рече главниот извршен директор на регулаторот Ендрју Родс.
Скај њуз пристапи до податоците од страницата Bloxmoon, што покажува дека корисниците изгубиле вкупно 11,4 милиони долари (околу 8,9 милиони фунти) од лансирањето на страницата кон крајот на 2022 година.
Валутата за виртуелна игра на Roblox, Robux, треба да се користи за купување предмети во играта како облека и дополнителни искуства. Robux се купуваат со вистински пари, обично по цена од околу 1 £ на 100 Robux. Кога корисникот креира сметка на страницата на казиното користејќи податоци на Roblox, казиното добива пристап до неговата сметка на Roblox. Некои сајтови бараат од корисниците да потврдат дека имаат над 18 години или да го внесат датумот на раѓање, но не ја потврдуваат возраста на корисникот.
Потоа казиното го пренесува Robux на корисникот на друга сметка на Roblox под негова контрола. За возврат, на корисникот му се доделуваат еквивалентни чипови за коцкање на страницата за казино. Овие виртуелни чипови може да се користат за игри како рулет и блек џек. Тие можат да се претворат назад во Robux или криптовалути, кои лесно може да се заменат за вистински пари.
© Vecer.mk, правата за текстот се на редакцијата
