„Знаете дека можете да сметате на нашата верна поддршка во интерес на слободата на украинскиот народ. Бидете силни и зачувајте ја својата непоколеблива вера!“ напиша Мелони на англиски на Твитер, обраќајќи му се на украинскиот претседател Володимир Зеленски.

Тоа беше одговор на пораката на украинскиот претседател во која ѝ ја честиташе изборната победа.

„Ја цениме постојаната поддршка на Италија за Украина во борбата против руската агресија. Сметаме на конструктивно партнерство со новата италијанска влада“, напиша Зеленски во пораката на Твитер. Рим испраќаше оружје во Украина за да се одбрани од руските сили.

Џорџија Мелони, која најверојатно ќе биде првата жена на чело на италијанската влада, му возврати на честитките и на полскиот премиер Матеуш Моравјецки. „Заедно да ги браниме нашите вредности и европската безбедност“, објави таа на Твитер. Како одговор на честитката на британската премиерка Лиз Трас, таа рече дека е „подготвена да соработува за слободата, демократијата, безбедноста и благосостојбата на нашите земји“.