- По победата на Трамп на изборите во САД, надежите за прекин на руско-украинската војна се зголемија. Ја поддржуваме територијалната целовитост на Украина, што е јасно од нашиот став во однос на Крим, истакна Фидан.
- Сепак, забележуваме дека оваа војна не носи корист на ниту една од страните – само предизвикува повеќе човечки загуби, уништување и финансиски трошоци. Овој факт им го објаснуваме на нашите американски и западни партнери и ја истакнуваме потребата од преговори меѓу завојуваните страни, рече турскиот министер за надворешни работи.
Фидан потсети дека Турција од првиот ден на конфликтот инсистира на дипломатско решение, пренесува Анадолија.
- Ги искористивме сите дипломатски можности за да ги доведеме страните на преговарачка маса. На почеток тоа го направивме во Анталија, а потоа и во Истанбул. На крајот од техничките преговори во Истанбул, бевме многу блиску до постигнување на мир, забележа Фидан.
Според него, Турција повторно е подготвена да игра улога на посредник во напорите за постигнување праведен и траен мир во Украина.
Во однос на односите меѓу Анкара и Вашингтон, Фидан изјави дека „дијалогот на високо ниво, заснован на сојузничките односи меѓу земјите, продолжува и се развива без оглед на тоа кој е на власт“ во САД.
- Стратешкиот механизам, воспоставен за решавање на проблемите меѓу Турција и САД, исто така ќе продолжи да функционира, додаде Фидан. /МИА
© Vecer.mk, правата за текстот се на редакцијата
