Њујоршката банкарска корпорација Голдман Сакс во својот најнов извештај предупредува дека царините наметнати од американскиот претседател Доналд Трамп ќе ја зголемат инфлацијата и невработеноста во САД, ќе го намалат економскиот раст и ќе го зголемат ризикот од рецесија.
Продолжуваме да веруваме дека ризикот од тарифите што ќе бидат воведени на 2 април е поголем отколку што претходно претпоставуваа многу учесници на пазарот, се нагласува во анализата на Голдман Сакс.
Според тековниот извештај, базичната инфлација во САД ќе достигне 3,5 отсто во 2025 година, што е зголемување од 0,5 процентни поени во споредба со претходната прогноза и значително над целта на Федералните резерви на САД од два отсто.
Покрај тоа, Голдман Сакс очекува економскиот раст на САД од четвртиот квартал на 2024 година до истиот квартал од 2025 година да биде еден процент, што е за 0,5 отсто помалку од претходната прогноза, пренесува CNBC.
Невработеноста во САД ќе изнесува 4,5 отсто, според најновата прогноза, што е зголемување за 0,3 процентни поени во однос на претходната прогноза.
Голдман Сакс сега вели дека веројатноста за рецесија во САД во следните 12 месеци е 35 отсто, во однос на 20 отсто претходно.
Економистите на „Голдман Сакс“ очекуваат ФЕД да ги намали каматните стапки три пати оваа година, во јули, септември и ноември, така што тие ќе бидат во опсег меѓу 3,5 и 3,75 проценти.
© Vecer.mk, правата за текстот се на редакцијата
