Италијанскиот министер за одбрана Гидо Крозето денеска предложи Европската унија да формира сопствени одбранбени капацитети според моделот на НАТО.
„Имаме шаблон, а тоа е НАТО. Сè што треба да направиме е да го копираме“, рече тој.
Министерот рече дека е премногу рано да се разговара дали Италија ќе учествува во мировната мисија во Украина, пренесе Анса.
„Целосно е апсурдно да се зборува за каква било интервенција, бидејќи не можете да одлучите што да правите во Украина додека не ги имате условите за мир, кои ние или Европа не ги дефинираме“, рече Крозето.
Тој рече дека фокусот сега треба да биде ставен на изградбата на европската и италијанската национална одбрана, истакнувајќи дека Германија неодамна го отстрани ограничувањето на инвестициите во одбраната во рок од два дена со промена на нејзиниот устав.
Крозето додаде дека очекува генералниот секретар на НАТО, Марк Руте, да постави цел за европските земји да ги зголемат трошоците за одбрана на 3,5 отсто од БДП на самитот во јуни, додека американскиот претседател Доналд Трамп повика расходите да се зголемат на пет отсто.
© Vecer.mk, правата за текстот се на редакцијата
