Францускиот претседател Емануел Макрон и неговата сопруга Брижит Макрон му посакаа добредојде на Доналд Трамп на Г-7 самитот, а средбата овојпат беше обележана со необичното ракување на американскиот претседател.
За време на неговото пристигнување на Самитот во Евијан, Трамп накусо се ракуваше со Макрон, по што следеше поздравот со Брижит… И, ракувањето со неа траеше околу 13 секунди. Тоа, според некој набљудувачи, се опишува како невообичаено долг, напнат, и „болно непријатeн“ поздрав, пренесува „Е-тајмс (ETimes)“. Според присутните, се чини, и г-н и г-ѓа Макрон имаа таков впечаток.
Гестот доаѓа по претходните тензии, кога Трамп јавно коментираше за бракот на Макрон за време на ескалацијата на односите меѓу двете страни. Зборувајќи на приватен настан во април, имено, каде што ја критикуваше Франција за, како што рече – недоволната поддршка за САД во Иран, Трамп рече и дека Брижит се однесува „екстремно лошо“ кон Емануел. Францускиот претседател подоцна одговори, велејќи дека таквите коментари „не се елегантни и не се на ниво на дипломатска комуникација“.
Трамп и Макрон имаат долга историја на незгодни и честопати напнати ракувања за време на нивните состаноци. И нивната прва средба во Брисел во 2017 година беше обележана со долго и цврсто ракување, што многумина уште тогаш го опишуваа како ран знак за нивната натамошна политичка динамика.
Во годините потоа, односот на двајцата лидери се менуваше меѓу блискоста и несогласувањето. Макрон го угости Трамп на прославата на Денот на Бастилја во Париз, со гала-вечера во Ајфеловата кула, додека американскиот претседател подоцна го пречека својот француски колега како почесен гостин на државна вечера во Белата куќа. До крајот на првиот мандат на Трамп, односите меѓу нив двајца се влошија, а тоа продолжи особено поради несогласувањата околу царините, Украина и Иран.
Последното ракување со Брижит Макрон, опишано од некои набљудувачи како „влечење јаже“, дополнително го привлече вниманието кон долгогодишните комплексни односи меѓу американскиот и францускиот претседател.
© Vecer.mk, правата за текстот се на редакцијата
