Локацијата на францускиот носач на авиони „Шарл де Гол“ беше откриена речиси во реално време откако еден морнар го сними своето трчање на палубата користејќи го популарниот фитнес тракер „Страва“. Безбедносниот пропуст се случил додека носачот бил распореден во источниот Медитеран за време на војната со Иран, објавува францускиот весник „Ле Монд“.
Според весникот, младиот поморски офицер користел паметен часовник за да евидентира трчање од повеќе од седум километри на палубата на бродот, а неговиот јавен профил на „Страва“ потоа ја прикажал локацијата на бродот во речиси реално време.
Потврда преку сателитски снимки
„Ле Монд“ го потврди безбедносниот пропуст користејќи сателитски снимки направени кратко време по снимањето на активноста. Фотографиите јасно го покажуваат карактеристичниот облик на носачот долг 262 метри, кој се наоѓал северозападно од Кипар, околу сто километри од турскиот брег.
Франција го објави распоредувањето на носачот во мисијата на 3 март, неколку дена по почетокот на американско-израелските напади врз Иран.
Генералштабот на француските вооружени сили потврди за „Ле Монд“ дека објавата не е во согласност со важечките правила за дигитална безбедност. Во исто време, тие објавија дека „командата ќе преземе соодветни мерки“.
Весникот, исто така, откри дека барем уште еден член на екипажот на француски воен брод на активна мисија јавно објавил геолоцирана спортска активност, што укажува дека ова не е изолиран случај.
© Vecer.mk, правата за текстот се на редакцијата
