Полицијата соопшти дека собирот „UK Ijtima“, кој се одржа од 9 до 12 јули во Шрабленд Хол во Бархам, бил прекинат рано во неделата како мерка на претпазливост по добивањето информации за можна сериозна закана, објави Би-Би-Си.
Според полициското соопштение, на собирот присуствувале околу 15.000 луѓе, а по добивањето информации за можна сериозна закана, бил прогласен „голем инцидент“, но подоцна ситуацијата била ставена под контрола.
Шефот на лондонската антитерористичка единица, Хелен Фланаган, изјави дека полициските екипи брзо реагирале и извршиле апсења на голем број локации низ земјата, вклучувајќи ги Ипсвич, Голем Манчестер, Есекс, Сари и Лондон.
Таа рече дека истрагата се спроведува во врска со десничарскиот тероризам, а полицијата, исто така, пребарува голем број адреси поврзани со апсењата.
Тројца други мажи беа уапсени под сомнение за заговор за убиство, додека една жена беше уапсена под сомнение за помагање на сторител.
Еден од осомничените оттогаш е ослободен со кауција, додека другите остануваат во притвор.
„Нема да се двоумиме да дејствуваме кога има потенцијална закана. Овој случај уште еднаш покажува дека нивото на терористичка закана во Велика Британија останува „сериозно““, рече Фланаган.
„Мора да се спротивставиме на омразата“
Министерката за внатрешни работи на Велика Британија, Шабана Махмуд, рече дека одговорот на полицијата на „веродостојната закана“ на настанот „несомнено спаси животи“.
Таа рече дека ги разбира загриженостите на британските муслимани во врска со случајот.
„Мора да се спротивставиме на омразата и да се обединиме околу заедничкото верување дека нашата земја е отворена, дарежлива и толерантна кон сите заедници“, рече таа.
Помошничката началничка инспекторка Алис Скот од полицијата во Сафолк изјави дека властите се свесни за загриженоста на локалната заедница и најавија зголемено полициско присуство во областа околу Шрабленд Хол во наредните денови.
Полицијата соопшти дека нема позната поширока закана за јавноста од инцидентот.
Фото: ВИ илустрација
© Vecer.mk, правата за текстот се на редакцијата
