Лидерите на групата која ја доби Нобеловата награда за мир, која ги претставува преживеаните од нападите со атомска бомба на САД врз Хирошима и Нагасаки, предупредија на зголемениот ризик од нуклеарна војна и го повторија својот повик за укинување на нуклеарното оружје.
„Меѓународната ситуација се влошува, а сега се водат војни бидејќи државите се закануваат со користење нуклеарно оружје“, рече Шигемицу Танака, преживеан од американското бомбардирање на Нагасаки во 1945 година и ко-водач на групата Нихон Хиданкио.
„Се плашам дека како човештво сме на пат кон самоуништување. Единствениот начин да се запре тоа е да се укине нуклеарното оружје“, додаде тој.
При доделувањето на наградата на преживеаните, норвешкиот Нобелов комитет укажа на уништувањето предизвикано од атомските бомбардирања на Хирошима и Нагасаки и децениската работа на јапонската група за отстранување на нуклеарното оружје.
Напорите на групата се клучни во денешниот свет, рече одборот, без да именува ниту една земја.
Рускиот претседател Владимир Путин минатиот месец сигнализираше дека Москва би можела да размисли за нуклеарен одговор доколку Соединетите Држави и нивните сојузници дозволат Украина да изврши напади длабоко во Русија користејќи западни ракети со долг дострел.
© Vecer.mk, правата за текстот се на редакцијата
