Европските аеродроми периодов се соочуваат со сериозни застои и долги редици поради воведувањето на новиот систем за контрола на границите на Европската Унија, познат како Entry/Exit System (EES). Иако целта на овој систем беше модернизација преку земање биометриски податоци, отпечатоци од прсти и скенирање на лице, првите недели од неговото функционирање донесоа хаос наместо ефикасност. Технологијата на граничните премини се покажа како недоволно подготвена да го издржи притисокот на огромниот број патници, што резултираше со нервоза кај туристите и доцнења кои го загрозуваат нормалниот проток на сообраќајот.
Како одговор на растечките проблеми, Грција прва одлучи привремено да ги суспендира биометриските проверки за британските туристи, давајќи и предност на успешната туристичка сезона пред строгите административни процедури. Овој пример веќе почнува да го следи и Португалија, која им дозволува на патниците да ги заобиколат проверките кога редиците стануваат предолги, додека Италија се подготвува за сличен чекор. Земјите како Шпанија, Франција и Хрватска внимателно ја следат ситуацијата, свесни дека милијарди евра приходи и илјадници работни места зависат од брзината и удобноста на патувањето.
Под силен притисок од туристичкиот сектор и авиокомпаниите како „Ryanair“, кои предупредуваат на пропуштени летови и големи финансиски загуби, Европската комисија призна дека постојат потешкотии во имплементацијата. Како решение е воведена таканаречена „вградена флексибилност“, која им овозможува на земјите-членки во периоди на голем метеж привремено да ги паузираат биометриските скенирања и да се вратат на класичното печатирање на пасошите. Оваа ситуација отвора сериозна дебата за тоа дали Европа може да постигне истовремена врвна безбедност и брз проток, при што во моментов економските интереси се чини дека го преземаат приматот над строгите дигитални правила.
© Vecer.mk, правата за текстот се на редакцијата
