Вечерва, „Билд“ ексклузивно објави дека и Германија испраќа војници во Гренланд.
Веста доаѓа само неколку часа откако шведскиот премиер Улф Кристерсон го најави истото.
„Сè одеднаш се случува многу брзо. Според информациите од „Билд“, Германија ќе испрати војници во Гренланд оваа недела“, пишува германскиот весник, повикувајќи се на неколку извори во Германија и Скандинавија.
Прво, дознаваат, веќе во четврток ќе биде испратен тим составен од неколку членови на Бундесверот.
Германската влада штотуку ги потврди написите на „Билд“. Министерството за одбрана потврди дека Германија утре ќе испрати 13 војници во Гренланд, на извидувачка мисија со други европски земји, по барање од Данска.
Целта на мисијата, која ќе трае до сабота, е да се испитаат можните воени придонеси за зајакнување на безбедноста на регионот, според соопштението за медиумите од Министерството за одбрана. Ова би можело да вклучува и поморски надзор.
Претходно, данските вооружени сили објавија дека ќе има „проширено воено присуство во и околу Гренланд“, вклучувајќи авиони, морнарица и војници на сојузниците на НАТО.
„Билд“ пишува дека се очекува и другите европски членки на НАТО да го следат примерот на Германија. Според информациите што ги добиле, целата операција е координирана од Копенхаген, а не преку структурите на НАТО, а Соединетите Американски Држави не се вклучени во неа.
Германија би можела да учествува во заедничката мисија во Гренланд со мисијата за обука на планинските трупи, морнарицата и воздухопловните сили. Гренланд, истакнуваат тие, долго време се сметаше за можна база за распоредување на новиот поморски патролен авион „Посејдон“.
Германскиот министер за одбрана Борис Писториус (65) денес, во статија за „Ди Цајт“, го повика НАТО да го заштити Гренланд и околниот регион од руска и кинеска агресија, што се смета за отстапка кон Доналд Трамп, кој сака да го контролира Арктикот преку Гренланд.
Фото: Lars Berg
© Vecer.mk, правата за текстот се на редакцијата
