Кинескиот претседател Си Џинпинг би можел да ја посети Северна Кореја уште следната недела, а постои голема веројатност посетата всушност да се одржи кон крајот на овој месец или на почетокот на следниот месец, изјавија денес јужнокорејски извори за „Јонхап“.
Висок јужнокорејски функционер изјави дека има разузнавачки информации што укажуваат на непосредна посета на кинескиот претседател на Пјонгјанг, додека друг извор рече дека посетата би можела да дојде по неодамнешната посета на кинескиот министер за надворешни работи Ванг Ји на Северна Кореја, како и по пристигнувањето на кинескиот безбедносен и протоколарен персонал во Пјонгјанг.
За време на разговорите со Ванг, севернокорејскиот лидер Ким Џонг Ун ја изрази својата подготвеност да ги зајакне контактите на високо ниво и да ја подобри стратешката комуникација со Пекинг, потсетувајќи на неговата посета на Кина минатата година.
Можната посета на Си Џинпинг доаѓа и по неговите неодамнешни разговори со претседателот на Соединетите Американски Држави Доналд Трамп во Пекинг, за време на кои двајцата лидери ја потврдија заедничката цел за денуклеаризација на Северна Кореја.
Според друг извор, кинескиот претседател би можел да се обиде да посредува во односите меѓу Северна Кореја и Соединетите Американски Држави за време на посетата.
Оваа година се одбележува 65-годишнината од потпишувањето на сеопфатниот договор за соработка меѓу Кина и Северна Кореја, потсетува јужнокорејската новинска агенција.
© Vecer.mk, правата за текстот се на редакцијата
