Украинскиот претседател Володимир Зеленски верува дека сценарио слично на она во Јужна Кореја би можело да се случи во Украина, кога на крајот од Корејската војна не беше потпишан вистински мировен договор, но земјата сепак успеа да просперира.
„Ме прашувате дали такво сценарио може да се случи во Украина? Мојот одговор е дека сè е можно. Треба да се напомене дека Јужна Кореја го има својот главен сојузник: Соединетите Американски Држави, кои нема да дозволат Северна Кореја да ја освои. Значи, сè е релативно. Јужнокорејците сè уште преземаат ризици“, рече Зеленски во интервју за француското списание „Ле Поан“.
„Споредбата со Јужна Кореја има свои ограничувања“
Зеленски тврди дека сè додека Северна Кореја е управувана од сегашното раководство, Јужна Кореја нема да биде целосно заштитена. Сепак, тој забележува дека Јужна Кореја има многу системи за воздушна одбрана кои ја гарантираат нејзината безбедност.
„Искрено, Украина е решена да добие сигурни безбедносни гаранции, како што е системот „Патриот“ што го има Јужна Кореја. Но, споредбата со Јужна Кореја има свои ограничувања. Населението на Северна Кореја е малку повеќе од 20 милиони, додека населението на Русија е над 140 милиони. Овие закани не можат да се споредат. Заканите од Русија се пет, шест или дури десет пати поголеми“, предупреди тој.
„Идентичната репродукција на јужнокорејскиот модел веројатно нема да ѝ одговара на Украина во однос на безбедноста. Сепак, нејзиниот економски модел е добар пример“, изјави тој.
© Vecer.mk, правата за текстот се на редакцијата
