Новите Aмерикански царини за стоки од 60 земји стапија на сила утрово, со што десетици трговски партнери на САД, меѓу кои земји од Европа, Кина и Индија, ќе се соочат со тарифи од 10 до 12,5% за производите што ги извезуваат на американскиот пазар. Според Канцеларијата на американскиот трговски преставник, новите мерки се однесуваат на стоки што сочинуваат дури 99,4 проценти од американскиот увоз, пренесе CNN.
„Претседателот нема да дозволи неговата трговска политика и пошироките цели да бидат поткопани само затоа што еден инструмент може да биде ограничен со судска наредба или некој друг фактор“, изјавија високи претставници на Белата куќа за новинарите во четвртокот за време на брифингот на кој ги објавија мерките.
Најновата одлука доаѓа по повеќемесечна истрага на американскиот трговски претставник за наводната употреба на принудна работа во производството на стоки извезени во САД, како и неуспехот на поединечните земји да ги спречат ваквите практики.
Европската Унија ги доведе во прашање новите тарифи, а шефицата за надворешна политика на ЕУ, Каја Калас, ги нарече „негативно изненадување“ и ги отфрли тврдењата за принудна работа како неосновани. Швајцарија, исто така, ги отфрли обвинувањата, додека Норвешка рече дека не планира да возврати со воведување тарифи за американската стока.
Во соопштение објавено во четврток, Бразил ја отфрли тарифата од 12,5 проценти за своите стоки и го повтори своето барање за реципроцитет. Министерот за економија на Мексико во видео порака објавена на социјалните мрежи рече: „Не гледаме никаква промена во ефективната тарифа што Мексико ја плаќа денес“.
Австралија, која исто така се соочува со тарифа од 12,5 проценти, изрази противење на новите мерки. Министерот за трговија, Дон Фарел, во петокот им рече на новинарите дека потегот на Вашингтон е „тотално неоправдан“ и додаде дека Канбера ќе продолжи да лобира кај САД да ги отстранат сите тарифи за австралиската стока.
Новите стапки се однесуваат на увоз од земји кои ги снабдуваат САД со речиси сите стоки што земјата ги купува од странство. Администрациските претставници рекоа дека различни производи се ослободени, вклучувајќи нафта и гас, како и стоки што не можат да се произведуваат во САД.
Времето на новите мерки беше избрано за да се „избегне сложеноста“ на додавање нови давачки на постојните тарифи од 10 проценти, рекоа претставници на администрацијата. Тие додадоа дека бизнис лидерите бараат поголема стабилност и предвидливост во врска со тарифите. Тоа претставува голем пресврт од ситуацијата пред една година, кога компаниите беа во средината на хаотичната политика на Трамп на наизменични тарифи повремено.
© Vecer.mk, правата за текстот се на редакцијата
