Московската фабрика „Рено Русија“, која стана сопственост на градот Москва по повлекувањето на француската групација, ќе произведува патнички возила од марката „Москвич“ – некогаш позната советска марка, изјави градоначалникот на руската престолнина. Сергеј Собјанин.

– Ќе дадеме се од себе да го спасиме најголемиот дел од персоналот кој работи во фабриката. Главен технолошки партнер на московската фабрика за автомобили „Москвич“ ќе биде КАМАЗ. Во првата фаза ќе се организира производство на класични автомобили со мотори со внатрешно согорување, а во иднина и електрични возила – изјави Собјанин.

Руското Министерство за трговија соопшти дека руските акции во групацијата „Рено“ стануваат сопственост на државата и владата на Москва. Сервисот на автомобилите „Рено“ во Русија ќе го врши „АвтоВАЗ“ кој ќе продолжи да ја произведува целата линија на автомобили „Лада“ во своите фабрики.

„АвтоВАЗ“ произведува автомобили и автоделови за две марки „Лада“ и „Рено“ во фабриките во Толјати и Ижевск.