Високата претставничка на ЕУ за надворешна политика и безбедност, Каја Калас, изрази отворено незадоволство по состанокот на министрите за одбрана, истакнувајќи дека европската одбранбена индустрија сè уште не произведува доволно, и покрај инвестициите од милијарди евра. Таа направи остар контраст со Украина, која за само четири години се трансформираше во сериозна воено-индустриска сила која денес извезува опрема, помага во заштитата на Блискиот Исток и претставува клучен извор на иновации.
Европската унија презеде конкретни чекори за поддршка, обезбедувајќи 150 милијарди евра поволни одбранбени заеми и менувајќи ги критериумите за јавни набавки со цел да се поттикне заедничкото купување меѓу државите членки. Сепак, Калас предупреди дека иако има раст во производството на муниција и системи за противвоздушна одбрана, потребите на земјите членки растат уште побрзо. Како дополнителен проблем таа ги наведе различните стандарди и правила кај државите, што го кочи брзото проширување на производството.
Во насока на надминување на овие пречки, најавено е зајакнување на Европската одбранбена агенција со фокус на иновациите и заедничките проекти. Калас порача дека европската индустрија мора да го прифати и примени искуството стекнато од Украина на бојното поле.
© Vecer.mk, правата за текстот се на редакцијата
