Русија не бара конфликт со Алијансата, објави врховниот командант на Здружените сили на НАТО во Европа, генералот на воздухопловните сили на САД, Алексус Гринкевич, на аеромитингот ILA 2026 во Берлин.
Одговарајќи на прашања за можноста Москва да употреби воена сила против балтичките држави, Гринкевич рече:
- Ги проучував разузнавачките информации многу внимателно. Русија не бара конфликт.
Според него, во Москва добро разбираат што значи терминот одбранбен сојуз и се свесни дека НАТО има голем број „асиметрични предности“.
Од друга страна, генерал-поручникот на германската армија, Кристијан Фројдинг, на истиот состанок изјави дека во рамките на НАТО постои „широк консензус“ дека конфликт со Русија може да се случи пред 2030 година.
- Годината 2029 не е германска проценка. Ова се разузнавачки информации договорени во НАТО - рече Фројдинг, додавајќи дека Русија би можела да дејствува порано.
Финскиот претседател Александар Стуб на 7 јуни изјави дека не верува во тврдењата дека Русија планира напад врз НАТО.
„Русија ќе продолжи да ги тестира земјите од НАТО, но нема да има конфликт“, рече тој.
Генералниот секретар на НАТО, Марк Руте, постојано ги предупредуваше членовите на Алијансата „да не бидат наивни“ кога станува збор за заканите од Русија. Претходно, тој исто така изјави дека Европејците би можеле да го научат рускиот јазик за неколку години ако европските земји не ги зголемат средствата за одбрана.
Руското раководство постојано ги отфрла тврдењата за можен напад врз Европа. Рускиот претседател Владимир Путин претходно изјави дека Русија „нема причина“ да војува со земјите од НАТО.
- Нема геополитички, економски, политички или воен интерес - рече Путин.
Подоцна оцени дека „сите земји од НАТО се во војна против Русија“ и нагласи дека руската армија денес е, според него, најспособната борбена сила во светот.
© Vecer.mk, правата за текстот се на редакцијата
