Канцеларијата за управување со катастрофи и вонредни состојби при турското Министерство за внатрешни работи денес објави дека борбата против шумските пожари што горат во неколку провинции сè уште е во тек и дека 2.619 лица се преместени во безбедни зони поради пожарот.
Во објава на социјалните мрежи, министерството изјави дека напорите за контрола и гаснење на шумските пожари, од копно и од воздух, продолжуваат во Сакарја, Билеџик, Ескишехир, Афјонкарахисар и Карабук, објави денес Анадолу.
Генералната дирекција за шумарство (OGM) изјави дека тековните пожари во округот Газиемир во Измир и округот Шехиткамил во Газиантеп се ставени под контрола, како и пожарите во областите Мудурну и Бол.
Во соопштението се вели дека пожарникарите сè уште се борат да ги стават пожарите под контрола во округот Сејитгази во Ескишехир и округот Сафранболу во Карабук.
„Како дел од напорите за гаснење на пожарот, беа ангажирани 4.231 лица, 45 авиони и 1.236 копнени возила“, се наведува во соопштението на Генералниот директорат за шумарство.
Десет пожарникари загинаа, а 14 беа повредени вчера во гаснењето пожар во централна Турција, откако 24 пожарникари беа заробени во пожарот кога ветерот одеднаш се смени и ги турна пламените кон нив.
© Vecer.mk, правата за текстот се на редакцијата
