Најмалку пет лица загинаа во вооружен напад во германскиот град Стаде, во покраината Долна Саксонија.
Полицијата и итните служби спроведуваат голема акција во Стаде, град оддалечен околу 50 километри од Хамбург. Над центарот на градот кружат два полициски хеликоптера.
Портпарол на полицијата потврди дека пет лица се мртви по пукањето со огнено оружје.
Според првичните информации, пукањето се случило во областа Данкерсштрасе (Dankersstraße) во Стаде, Долна Саксонија. Полицијата привела две лица, а едно од нив се смета за осомничено.
„Ве молиме избегнувајте го тоа подрачје“, соопшти Полициската управа во Линебург преку платформата X.
Пукањето се случило во близина на младинска установа
Околу 13:45 часот полицијата официјално потврди дека во пукањето во центарот на градот, кој има околу 50.000 жители, загинале пет лица.
Местото на нападот се наоѓа во непосредна близина на младинска установа, објавува германскиот весник Bild. Засега не е познато дали меѓу жртвите има деца или млади лица. Во близина се наоѓа и полициската станица во Стаде.
Мотивот за крвавиот напад сè уште не е познат, а истрагата е во тек.
© Vecer.mk, правата за текстот се на редакцијата
