Унгарија нема да ја промени својата политика кон војната во Украина и нема да испраќа оружје во Киев, изјави потпретседателката на унгарската влада и министерка за надворешни работи, Анита Орбан, во интервју за италијанскиот весник „Кориере дела Сера“.
„Нашата политика по ова прашање останува непроменета. Унгарските гласачи ни дадоа мандат да не испраќаме оружје, туку да помагаме на други начини, со хуманитарна помош и санкции“, нагласи Орбан.
„Секоја земја мора да оди по истиот пат и да ги исполнува истите критериуми“
Таа истакна дека едно од клучните прашања во односите меѓу Унгарија и Украина е положбата на унгарското малцинство во украинскиот регион Закарпатија, нагласувајќи дека Будимпешта го поддржува пристапувањето на Украина во Европската Унија исклучиво врз основа на исполнување на критериумите.
„Ние го поддржуваме членството врз основа на заслуги, во согласност со методологијата за пристапување во ЕУ. Секоја земја мора да помине низ истиот пат и да ги исполнува истите критериуми, што е прашање на кредибилитетот на Европската Унија“, рече таа. Таа додаде дека Унгарија постигнала билатерален договор со Киев за прашања поврзани со правата на малцинствата, оценувајќи го како „неопходен предуслов за воспоставување нови односи“.
Зборувајќи за односите со Русија, Орбан изјави дека таа земја, поради својата географска положба, големина и влијание, останува важен фактор во Европа.
„Сакаме многу прагматичен однос со Москва, меѓу суверени држави“, рече таа.
„Има голема промена во менталитетот“
Осврнувајќи се на внатрешната политика, Орбан рече дека по промената на владата, Унгарија е „вратена во Европа“ и дека новата влада работи на демонтирање на наследството од претходната администрација.
Таа ги отфрли критиките од опозицијата и организациите за човекови права за наводни притисоци врз институциите и уставните промени, велејќи дека владата „гради општество засновано на владеењето на правото преку владеењето на правото“.
„Користиме правни инструменти за промена на системот“, рече таа, додавајќи дека претходната влада ги назначила своите вработени во бројни институции и воспоставила правила што ги отежнале реформите. Според неа, во Унгарија е во тек „голема промена во менталитетот“, а граѓаните се сè пооптимистични за иднината на земјата.
© Vecer.mk, правата за текстот се на редакцијата
