Велика Британија ќе ја изгубеше Втората светска војна доколку Кир Стармер ја водеше тогаш, рече Мајк Хакаби, американскиот амбасадор во Израел.
Хакаби е незадоволен од одговорот на Стармер на планот на Израел за преземање на Газа.
„Значи, од Израел се очекува да се предаде на Хамас и да го храни иако израелските заложници гладуваат? Дали Британија се предаде на нацистите и фрлаше храна по нив? Ако бевте премиер, во Британија ќе се зборуваше германски“, нагласи Хакаби.
Стармер претходно ги осуди плановите на Израел да ја преземе Газа како „погрешни“ и ја повика израелската влада веднаш да ја преиспита својата одлука „за понатамошно ескалирање на офанзивата“.
„Одлуката на израелската влада за понатамошно ескалирање на својата офанзива во Газа е погрешна и ја повикуваме веднаш да ја преиспита. Оваа акција нема да направи ништо за да го заврши овој конфликт или да обезбеди ослободување на заложниците. Само ќе донесе повеќе крвопролевање“, рече Стармер.
Меѓународната заедница остро го критикува израелскиот план
„Дали некогаш сте слушнале за Дрезден, премиере Стармер? Не фрлавте храна таму“, одговори Хакаби. За време на Втората светска војна, британските и американските сили фрлија 4.000 тони бомби врз источногерманскиот град во текот на два дена, убивајќи десетици илјади цивили.
Во раните утрински часови, безбедносниот кабинет на израелскиот премиер Бенјамин Нетанјаху ги одобри плановите за преземање на главниот град Газа, во контроверзна ескалација на војната на територијата. Нетанјаху претходно изјави дека сака да ја преземе контролата врз целиот Појас Газа, но одобрениот план конкретно се фокусира на градот Газа на северот од територијата, дом на стотици илјади Палестинци.
Израелскиот потег наиде на жестоко противење, вклучително и во рамките на Израел. Планот беше остро критикуван и на меѓународно ниво. Високиот комесар на Обединетите нации за човекови права, Фолкер Турк, предупреди дека понатамошната ескалација на војната ќе предизвика „помасовно присилно раселување, повеќе убиства и понеподносливо страдање“.
По објавувањето на израелскиот план, германскиот канцелар Фридрих Мерц објави дека Германија ќе го суспендира извозот на оружје во Израел, кое би можело да се користи во Газа. Сепак, САД не го осудија овој потег.
© Vecer.mk, правата за текстот се на редакцијата
