Островот на змии (Ilha de Queimada Grande), 32 километри од брегот на Сао Паоло, е дом на златниот поскок (Bothrops insularis). Со право наречен „Остров на змиите“, тој се простира на 430.000 квадратни метри и е единственото место на планетата каде што живее овој вид змија.
Островот речиси и да нема посетители, освен неколку научници кои добиваат посебна дозвола секоја година да проучуваат змии. Исто така, повремено го посетува и бразилската морнарица, која го одржува светилникот изграден во 1909 година – но и тaa брзо се повлекува.
Тие развиле исклучително моќен отров
Се верува дека ловците на змии доаѓале на островот за да ловат златни отровници, кои на црниот пазар можат да достигнат цена и до 30.000 евра.
Златната змија еволуирала во изолација откако островот бил одвоен од копното со зголемување на нивото на морето пред околу 11.000 години, оставајќи ги змиите без различни извори на храна. Нивниот главен плен станале птиците преселници, но проблемот бил што повеќето змиски отрови дејствувале бавно – понекогаш и со денови. Додека отровот ќе почнел да дејствува, птицата веќе ќе одлетала.
Поради ова, овие змии развиле отров кој дејствува речиси веднаш – пет пати е посилен од повеќето други змии, па дури е способен и да стопи човечко месо.
Кај луѓето, каснувањето од златна змија носи околу 7% ризик од смрт. Пред островот официјално да биде забранет за посетители, биле запишани бројни приказни за луѓе кои страдале од фатални каснувања.
Бурното минато на Змискиот Остров
Една од попознатите приказни раскажува за рибар чиј мотор на чамец се расипал. Во потрага по помош, тој се закотвил покрај островот и се упатил кон внатрешноста, несвесен за опасностите што го чекаат. Кога чамецот бил пронајден, рибарот лежел мртов, во локва крв и покриен со каснувања од змии.
Друга легенда се однесува на последниот чувар на светилникот, кој живеел на островот со своето семејство. Според приказните, змиите влегле во нивната куќа низ прозорците, поради што во паника се обиделе да избегаат. Нивните тела наводно подоцна биле пронајдени расфрлани низ островот.
Самото име на островот – Иља де Кеимада Гранде – значи „остров што гори“, бидејќи во минатото имало неуспешен обид таму да се развие плантажа со банани со горење на шумската вегетација.
Денес тие се критично загрозени, но сепак опасни
Во последните 15 години, популацијата на змии на островот се намалила за околу 15%, делумно поради уништување на шумите и болести. На Црвената листа на Меѓународната унија за зачувување на природата (IUCN), златната змија моментално е наведена како критично загрозен вид.
Сепак, со оглед на тоа што илјадници змии сè уште го населуваат островот, може да се каже дека ова веројатно не е идеална дестинација за одмор.
© Vecer.mk, правата за текстот се на редакцијата
