Земјите-членки на ЕУ денес формално усвоија регулатива со која се воведува правно обврзувачка, постепена забрана за увоз на руски течен природен гас (LNG) и гас од гасоводи со целосна забрана од крајот на 2026 година, односно есен 2027 година.
„Се ослободуваме од штетната зависност од рускиот гас и во духот на солидарност и соработка правиме голем чекор кон автономна енергетска унија“, изјави кипарскиот министер за енергетика, Михаел Дамијанос, чија земја претседава со Советот на ЕУ.
Унгарија и Словачка, кои сè уште се многу зависни од увозот на руска енергија, гласаа против регулативата, Бугарија се воздржа, а сите други членки гласаа за неа. Унгарија објави дека ќе поднесе жалба до Судот на правдата на ЕУ.
Членовите мора да подготват планови за диверзификација до 1 март
Регулативата стапува на сила денот по објавувањето во Службен весник, а забраната ќе почне да се применува шест недели по стапувањето во сила на регулативата, односно од тогаш повеќе нема да биде можно да се склучуваат договори за увоз на руски гас.
Одобрен е преоден период за постојните договори. Целосна забрана за увоз на течен природен гас (LNG) ќе стапи на сила од почетокот на 2027 година, а увозот на гас преку цевководи од есента 2027 година. До 1 март оваа година, земјите-членки мора да подготват национални планови за диверзификација на снабдувањето со гас и да ги идентификуваат потенцијалните предизвици во замената на рускиот гас.
Земјите од ЕУ кои сè уште увезуваат руска нафта, исто така, ќе мора да поднесат планови за диверзификација. Пред да го одобрат увозот на гас во Унијата, земјите од ЕУ ќе мора да проверат каде е произведен гасот. Предвидени се големи казни за поединци и компании за непочитување на новите правила.
Пред руската инвазија на Украина во февруари 2022 година, Европската Унија увезуваше повеќе од 40 проценти од својата потрошувачка на гас од Русија. Според најновите податоци, тој увоз падна на околу 13 проценти. Сепак, некои земји како Унгарија и Словачка продолжуваат да увезуваат гас од Русија, која ја финансира војната во Украина со овие средства.
© Vecer.mk, правата за текстот се на редакцијата
