Рускиот претседател Владимир Путин денес разговарал со четири клучни лидери на земјите од Персискиот Залив, предупредувајќи на опасноста американските и израелските напади врз Иран да се претворат во поширок регионален конфликт, објави CNN.
По разговорите со престолонаследникот на Саудиска Арабија, Мохамед бин Салман, Кремљ објави дека „двете страни изразиле сериозна загриженост за реалниот ризик од проширување на зоната на конфликт, која веќе ги зафати териториите на голем број арапски земји и има катастрофални последици“.
„Ова е исклучително опасно“
Путин ја нагласил потребата од дипломатија за решавање на „екстремно опасна ситуација“, додека, според Кремљ, саудискиот престолонаследник рекол дека Москва, благодарение на добрите односи со Иран и земјите од Заливот, може да игра стабилизирачка улога.
Русија постојано ги осудува американските и израелските напади и атентатот врз врховниот лидер на Иран, ајатолахот Али Хамнеи.
Путин разговарал и со претседателот на Обединетите Арапски Емирати, Мохамед бин Зајед Ал Нахјан.
„Двете страни ја нагласија потребата од прекин на непријателствата и враќање на политичкиот и дипломатскиот процес“, објави Кремљ.
Загриженост за вклучување на трети земји
Кремљ, исто така, објави дека Путин и емирот на Катар, Тамим бин Хамад Ал Тани, „изразиле загриженост за ризикот од ширење на конфликтот на Блискиот Исток и опасноста од вклучување на трети земји во него“ во телефонски разговор.
Рускиот претседател, според Кремљ, разговарал и со кралот на Бахреин.
© Vecer.mk, правата за текстот се на редакцијата
