Рускиот претседател Владимир Путин му рече на новинарот Павел Зарубин во едно интервју дека на пат кон Минхенската безбедносна конференција во 2007 година, го преработил својот говор, кој подоцна станал историски значаен.
Шефот на руската држава рече дека многумина на Запад ги сметале неговите тези за сурови, но дека биле многу навремени.
Во Минхен, Путин го критикуваше униполарниот свет со САД во улога на хегемон, ја осуди нелегалната употреба на воена сила од страна на Западот против земјите што ги сметаат за „непожелни“, проширувањето на НАТО кон Исток и ја истакна улогата на Русија во меѓународните односи.
„Го напишав мојот говор во Минхен за време на летот во авионот. Додека летавме за Минхен, го погледнав оригиналниот нацрт подготвен од моите колеги, го оставив настрана и напишав сè од почеток. Сметав дека е правилно и навремено да ги формулираме нашите загрижености“, нагласи тој.
Тој објасни дека го кажал ова не за да се расправа со некого или да му се спротивстави Русија на Западот - туку едноставно затоа што Русија не може да живее поинаку.
„Русија или ќе биде независна и суверена, или воопшто нема да биде. И тоа сакав да им го пренесам на нашите партнери со надеж дека ќе нè слушнат и барем донекаде ќе го преиспитаат својот однос“, подвлече Путин.
Како што додаде шефот на државата, му се чинеше дека е време да му каже на Западот: „треба да живееме во хармонија, да покажуваме меѓусебно почитување, без да ја наметнуваме нашата волја, без да се обидуваме да ја потчиниме другата страна, почитувајќи ги интересите на сите учесници во меѓународните односи“.
„Со оглед на тоа колку често се споменува тој говор, се чини дека сепак беше навремен. Но, за жал, не беше слушнат“, заклучи шефот на руската држава.
© Vecer.mk, правата за текстот се на редакцијата
