Француските власти во моментов истражуваат повеќе од сто пријави за насилство, сексуална злоупотреба и силување на деца во државните градинки и основни училишта. Оваа афера длабоко ја потресе земјата и покрена сериозни прашања за безбедноста на најмладите во образовниот систем. Канцеларијата на парискиот обвинител потврди дека се водат активни истраги во најмалку 84 градинки, дваесетина основни училишта и десетина дневни центри, пренесува „Гардијан“.
Обвинителката Лаура Бекуо изјави дека полицијата ги проверува пријавите за физичко насилство, сексуални напади и силување на деца на возраст од само три и четири години. Според адвокатите и родителите, овие грозоморни дела се случувале за време на училишните распусти, за време на ручекот, попладневните дремки и активностите по завршувањето на наставата.
Покрај сексуалните напади, родителите пријавуваат и фрапантни форми на физичко и психолошко малтретирање. Според извештаите, децата биле секојдневно навредувани, туркани, влечени за коса, принудувани да јадат до повраќање или пак им било целосно одземано правото на оброк. Поради ваквиот третман, кај многу деца се развиле сериозни трауми, па тие одбиваат да одат на училиште или градинка. Адвокатот Луис Кајез го опиша случајот на тригодишно момче кое доживеало толку тежок психолошки слом пред влезот на градинката што паднало во состојба слична на транс поради страв. Кајез додава дека родителите секојдневно поминуваат низ вистинска психолошка тортура додека го чекаат правниот исход од истрагата.
Во самиот центар на овој скандал се таканаречените училишни ревизори или монитори, односно лицата кои имаат обврска да ги надгледуваат децата за време на одморите, оброците и спиењето. За разлика од професионалните наставници, овие лица честопати не се вработени директно од Министерството за образование, туку од градските власти или локалните служби. Многумина од нив работат со скратено работно време, при што при вработувањето не се прават сериозни проверки на нивните биографии, а тие често немаат ниту соодветно стручно образование ниту педагошки квалификации. Родителите и адвокатите тврдат дека токму овие сериозни пропусти при вработувањето овозможиле насилството да продолжи со години без никакви санкции.
Како реакција на скандалот, градоначалникот на Париз, Емануел Грегоар, започна итен план вреден 20 милиони евра наменет за целосна реформа на системот на училишни монитори. Во периодот меѓу јануари и април веќе се суспендирани 78 вакви службеници, од кои 31 лице се сомничи директно за сексуална злоупотреба. Грегоар јавно призна дека и самиот како дете бил жртва на сексуална злоупотреба од страна на училишен монитор, посочувајќи дека најголемата колективна грешка во минатото била тоа што ваквите случаи се третирале како изолирани инциденти, наместо како длабок системски проблем заштитен со култура на молчење.
Оваа криза веќе добива и конкретна судска разрешница, па така уште следната недела во Париз ќе започне судењето на училишен монитор обвинет за сексуална злоупотреба на пет деца на возраст меѓу три и пет години. Во друг, одделен случај, наскоро се очекува пресуда и за 47-годишен монитор кој се товари за сексуална злоупотреба на девет девојчиња.
Родителските иницијативи и граѓанските движења, како што се #MeTooEcole и SOS Périscolaire, јасно ставаат до знаење дека ова е огромен национален проблем што ги надминува рамките на поединечните училишта или градови. Активистите предупредуваат дека француското општество конечно почнува да сфаќа дека училиштата веќе не се безбедното засолниште какво што сите го замислувале. Наместо тоа, децата секојдневно се соочуваат со вербално, физичко и сексуално насилство во самите институции, што предизвикува оправдан и масовен страв кај родителите ширум земјата.
© Vecer.mk, правата за текстот се на редакцијата
