Опасната паразитарна болест циклоспоријаза, која се добива преку контаминирана храна и пијалаци, експлодира во дури 32 американски сојузни држави. Досега се заразени речиси 7.000 луѓе, а над 140 завршиле во болница со тешка клиничка слика, јавува „Телеграф“.
Како главен осомничен за овој бран труења се посочуваат салатата и кромидот кои се служат во познатиот синџир за брза храна „Тако Бел“ (Taco Bell). Симптомите на оваа зараза се исклучително мачни и вклучуваат долготрајна дијареја, драстично губење на тежината, силни грчеви и висока температура.
Лекарите признаваат: Не знаеме како да го сопреме ширењето!
Епидемиолозите се соочуваат со сериозен проблем бидејќи првите симптоми на болеста можат да се појават дури 14 дена по јадењето на контаминираната храна, што го прави прецизното лоцирање на изворот речиси невозможно.
„Не знаеме што е изворот на заразата, а тоа е причината зошто таа продолжува масовно да се шири. Без да го најдеме точниот извор, не можеме да ја сопреме епидемијата“, изјави д-р Омер Аван.
Хаос во Вашингтон: Дали Трамп и РФК Помладиот се виновни за ширењето на паразитот?
Овој масовен здравствен инцидент веднаш се претвори во жестока политичка војна во САД. Демократите и експертите за јавно здравје со прст покажуваат кон администрацијата на Доналд Трамп и неговиот министер за здравство, Роберт Ф. Кенеди Помладиот.
Тие се обвинети дека со масовните отпуштања и кратења на буџетите буквално ги ослепиле државните институции кои треба да го контролираат квалитетот на храната. Поради овие мерки, клучната мрежа за следење на зарази „FoodNet“ минатото лето престана да контролира дури шест од осумте најопасни патогени што се пренесуваат преку храна.
„Минатата година РФК Помладиот го укина следењето на овој паразит во ек на драстични кратења на парите – сега илјадници Американци ги чувствуваат ужасните последици. Оваа администрација нè прави помалку безбедни“, изјави сенаторот Марк Ворнер.
И покрај жестоките критики и паниката меѓу граѓаните, од Министерството за здравство на САД тврдат дека состојбата е под контрола и дека надлежните служби активно соработуваат со сите сојузни држави за да се спречи понатамошно ширење на заразата.
© Vecer.mk, правата за текстот се на редакцијата
