Украина нема да ја даде својата земја на окупаторите, изјави украинскиот претседател Володимир Зеленски откако најави средба меѓу американскиот претседател Доналд Трамп и рускиот претседател Владимир Путин следната недела.
- Одговорот на украинското територијално прашање е веќе во Уставот на Украина. Никој нема и нема да може да отстапи од ова. Украина е подготвена за вистински одлуки што можат да донесат мир. Секакви одлуки против нас, секакви одлуки без Украина се исто така одлуки против мирот. Тие нема да дадат ништо. Тоа се мртви резолуции, никогаш нема да функционираат. И на сите ни треба вистински, жив мир што луѓето ќе го почитуваат. Подготвени сме, заедно со претседателот Трамп, заедно со сите партнери, да работиме на вистински и, најважно, траен мир - мир што нема да се сруши поради желбите на Москва - рече Володимир Зеленски.
Ова доаѓа откако американскиот претседател Доналд Трамп пред неколку часа објави дека ќе се сретне со рускиот претседател Владимир Путин во Алјаска во петок, 15 август, за да разговараат за војната во Украина.
Трамп наговести дека Украина би можела да отстапи територија во мировен договор со Русија, велејќи им на новинарите: „Ќе има некои размени на територии“.
Британската Би-Би-Си, повикувајќи се на американскиот Си-Би-Ес њуз, исто така објавува дека Белата куќа се обидува да ги убеди европските лидери да прифатат договор според кој Украина би предала големи делови од својата територија, вклучувајќи ги регионите Донбас, Херсон и Запорожје.
Зеленски претходно ги отфрли сите предуслови што вклучуваат територијални отстапки.
© Vecer.mk, правата за текстот се на редакцијата
