Усташките симболи мора да бидат отстранети од гробницата на озлогласениот командант на усташкиот логор Јасеновац, Вјекослав Макс Лубуриќ, на градските гробишта Каркаишент во покраината Валенсија, објавија шпанските власти, пренесува агенцијата ЕФЕ.
Според одлуката на шпанската влада, гробницата на Лубуриќ е вклучена во Каталогот на симболи и елементи спротивни на демократската меморија, што подразбира дека сите профашистички симболи мора да бидат отстранети од неа.
Вјекослав Макс Лубуриќ бил висок усташки офицер, командант на концентрациониот логор Јасеновац каде, според официјалните податоци од JUSP Јасеновац, биле убиени повеќе од 83.000 Срби, Евреи, Роми и хрватски политички противници на усташкиот режим.
По Втората светска војна, Лубуриќ се населил во Шпанија под заштита на диктатурата на Франко, каде што живеел нормален живот под лажно име, објави неодамна надлежното шпанско Министерство за демократско сеќавање.
Лубуриќ беше убиен во 1969 година во својот дом во Шпанија, веројатно во организација на Удба.
Извештајот на Техничката комисија на шпанската влада за симболите и елементите спротивни на демократското сеќавање укажува дека споменикот на гробот на Лубуриќ претставува величење на фашизмот и неговите протагонисти, што е некомпатибилно со демократските вредности и сеќавањето на жртвите, објавува шпанската новинска агенција ЕФЕ.
Надгробната плоча, поставена во 1976 година на видно место на гробиштата Каркаишент, содржи симболика и елементи што ја величат фигурата на функционерот одговорен за системот на концентрациони логори на Независната Држава Хрватска (НДХ) за време на Втората светска војна, како и усташкиот режим на кој тој припаѓал.
Затоа, до заинтересираните страни и надлежните регионални и локални власти беше испратено упатство за да се обезбеди итно отстранување на симболите на фашистичкиот усташки режим од спомениците и јавните простори, додава агенцијата.
Понатаму, наредено е да се постават натписи што даваат вистински историски контекст, во согласност со принципите на Законот за демократско сеќавање, со јасни упатувања на улогата на Лубуриќ во усташкиот режим и извршените злосторства - со посебен осврт на геноцидот извршен во логорот Јасеновац.
© Vecer.mk, правата за текстот се на редакцијата
