Данската премиерка Мете Фредериксен ќе го посети Гренланд од 2 до 4 април на разговори со новата влада на полуавтономната територија, изјави таа денеска, поради интересот на САД да ја преземат контролата врз арктичкиот остров.
"Со нетрпение очекувам да ја продолжиме блиската и доверлива соработка меѓу Гренланд и Данска“, се вели во соопштението на Фредериксен.
За време на посетата на американската воена база во северен Гренланд, американскиот потпретседател Џеј-Ди Венс вчера ја обвини Данска дека не прави добра работа за одржување на безбедноста на островот и сугерираше дека САД треба подобро да го заштитат стратешки лоцираниот остров.
„Ситуацијата бара единство“
Неговите забелешки дојдоа неколку часа откако Гренланд формираше нова широка владина коалиција предводена од Јенс-Фредерик Нилсен, кој ја нарече Данска свој најблизок сојузник.
Фредериксен, којa рече дека народот на Гренланд треба да одлучи за нивната иднина, вчера изјави дека описот на Венс за Данска е неправеден.
„Имам најдлабока почит за тоа како Гренландскиот народ и Гренландските политичари се справуваат со големиот притисок врз Гренланд“, наведе таа во денешното соопштение.
„Ова е ситуација која повикува на единство меѓу политичките партии и земјите во Кралството“, додаде таа.
© Vecer.mk, правата за текстот се на редакцијата
