Американскиот милијардер и сопственик на Тесла, Елон Маск, денес изјави дека верува оти главниот град на Белгија, Брисел, повеќе не е белгиски.
Коментарот на Маск дојде како одговор на резултатите од анкетата спроведена од белгискиот портал „immigratiebarometer“, кој се занимава со прашања за демографијата и имиграцијата во Белгија.
Порталот тврди дека најголемиот миграциски канал за влез во Белгија сè уште останува - семејното обединување.
Од 2018 година, годишниот просек се движел околу 56.000 нови семејни обединувања, се вели во истражувањето.
„Во 2020 година, единствениот пад беше забележан за време на пандемијата на коронавирусот. Во 2024 година, врвот беше забележан со 59.873 семејства кои беа обединети“, се вели во истражувањето.
Коментарот на Маск дека главниот град на Белгија повеќе не е белгиски беше објавен на социјалната мрежа X како директен одговор на објавата на Марио Навфал, основач на IBS Group, кој рече дека официјалните бројки покажуваат дека речиси три од четири деца во Брисел сега се од неевропско потекло и дека ова е трансформација со длабоки социјални последици.
„Само мал дел од малолетниците во градот се од белгиско потекло, додека огромното мнозинство доаѓа надвор од Европа, преобликувајќи ја идната популација во реално време. Ова не се случи случајно, туку преку намерни политички избори од страна на политичките елити кои ги отфрлија предупредувањата како митови“, рече Навфал.
Според него, кога главниот град ќе достигне точка каде што мнозинството од неговото население повеќе не ги дели историските, културните или граѓанските корени, интеграцијата станува илузија.
„Она што се случува во Брисел не е управување со различноста, туку демографска замена водена од политичка инерција и идеолошко слепило. Одбивањето да се признаат овие бројки само ја продлабочува недовербата на јавноста и гарантира понатамошен социјален раскол“, заклучи Навфал.
© Vecer.mk, правата за текстот се на редакцијата
