Бранителот на европската круна, репрезентацијата на Италија се падна во тешка група со Шпанија, Хрватска и Албанија. Италија има загрижувачки ефект против Шпанија и Хрватска затоа што ги загуби последните два дуела со Шпанците во полуфиналињата на Лигата на нациите (2021 и 2023), а има само една победа во девет дуели со Хрватска. Рекордот против Албанија е четири победи од четири меча.
Италија го отвара ЕП со Албанија на 15 јуни во Дортмунд, потоа игра со Шпанија на 20 јуни во Гелзенкирхен и на крајот со Хрватска на 24 јуни во Лајпциг.
„Можеше и подобро, но не заборавајте, ние сме Италија. Рано е да се прогнозира има уште многу месеци. Албанија се покажа како организиран тим, Хрватска е силна и искусна екипа. Имаат доста топ фудбалери, а познавам дел од нив. Ќе има моменти кога ќе мораме да се браниме, дури и со 10 играчи во поле доколку е потребно, но јас повеќе сакам атрактивен и напаѓачки фудбал. Многу работи ќе зависат од нашата форма за време на турнирот, па затоа мораме добро да ги одработиме подготовките“, изјави Спалети.
