Италијанскиот фудбалски стратег Роберто Манчини многу брзо ќе добие отказ од функцијата селектор на фудбалската репрезентација на Саудиска Арабија, пишуваат италијанските медуими, повикувајќи се на локални извори.
Во летото 2023 година, Манчини ненадејно ја напушти италијанската селекција и ја прифати астрономската понуда на Саудијците од околу 30 милиони евра годишно со што стана најплатениот тренер во светот.
Меѓутоа, во Саудиска Арабија ништо не оди според планот. Пред него беше поставена задача да го освои Азискиот куп и да се пласира на следниот Мундијал, а Манчини не ја исполни првата задача, откако доживеа целосен дебакл и беше елиминиран во осминафиналето на Азискиот куп во Катар на почетокот на оваа година.
Саудијците се на второто место во квалификациската група за СП 2026 со пет бода колку што имаат и Австралија и Бахреин. Лидер е Јапонија со десет бода. Како замена за Манчини се споменуваат Аргентинецот Рамон Дијаз и Французинот Ерве Ренар, кои наводно веќе биле контактирани.
