Реал (М) предмалку на својата официјална веб-страница го потврди она за што медиумите шпекулираа со денови. Карим Бензема го напушта „кралскиот клуб“ и по се изгледа се сели во Саудиска Арабија. По долги години минати на „Бернабеу“ со статусот на голема легенда на клубот, Французинот и официјално го напушта Реал и ќе продолжи на Блискиот Исток.
Во официјалното соопштение од Реал (М) се вели:
„Реал Мадрид и нашиот капитен Карим Бензема се договорија да го прекинат неговиот брилијантен и незаборавен период како играч на нашиот клуб. Реал Мадрид сака да ја покаже својата благодарност и сета своја наклонетост кон човекот кој е веќе една од нашите најголеми легенди. Карим Бензема пристигна во нашиот клуб во 2009 година, на само 21 година и беше фундаментален играч во ова златно доба од нашата историја. Во текот на четиринаесетте сезони во кои го бранеше нашиот дрес, тој освои 25 титули, рекорден број за Реал Мадрид: 5 европски купови, 5 светски клупски првенства, 4 европски супер купови, 4 лиги, 3 национални куп трофеи и 4 шпански Суперкупа. Мадридистите и сите навивачи ширум светот уживаа во неговиот магичен и уникатен фудбал, кој го направи еден од големите митови на нашиот клуб и една од големите легенди на светскиот фудбал. Реал Мадрид е и секогаш ќе биде негов дом и нему и на целото негово семејство му посакува се најдобро во оваа нова фаза од неговиот живот. Следниот вторник, 6 јуни, во 12:00 часот, ќе се одржи средба за збогување со Карим Бензема, со присуство на нашиот претседател Флорентино Перез“.
