Уште една блескава партија на Ненад Димитријевиќ во дресот на Хувентуд. Тимот од Бадалона беше на прагот на поразот, но благодарение на нашиот најдобар кошаркар се врати, се избори за продолжение, но крајот беше совладан на гостински кај Уникаха со 102-93 во рамките на 35. коло во Лига Ендеса.
Македонскиот репрезентативец одигра феноменално во последната четвртина, постигна 17 поени. На почетокот на овој период се чинеше дека победата е далечна, Хувентуд имаше минус 16 поени (71-55). Димитријевиќ од 33. до 36 минута со десет поени во низа ја стопи двоцифрената негатива, намали на 77-68 и го врати својот тим во игра за победа. На три и пол минути до крајот, Уникаха имаше предност од шест поени 78-75. Нено не застана, со нови седум поени приреди целосен пресврт, Хувентуд поведе со 78-82.
Домашниот состав успеа да изедначи на 84-84, останаа седум секунди напад за тимот од Бадалона, Димитријевиќ не погоди за победа, дуелот беше решен по продолжение, во кое Уникаха успеа да дојде до триумф.
На крајот мечот го заврши со 27 поени (3/4 за три, 7/12 за два, 4/7 за еден поен) и осум асистенции за нецели 30. минути во игра.
sportmedia.mk
