Македонската одбојкарска репрезентација ќе биде домаќин на Ф4 турнирот од Сребрената европска лига ова лето.
На денешната седница на Бордот на ЦЕВ, беше прифатена апликацијата на Одбојкарската федерација на Македонија за организација на завршниот турнир, а исто така, ЦЕВ целосно ги прифати сугестиите на челниците на ОФМ и го ревидираше календарот во Европската сребрена лига 2021.
Наместо на крајот на јуни, завршниот турнир ќе биде одржан викендот на 5 и на 6 јуни, а претходно, од 21-23 и од 28-30 мај се закажани двата турнира во групната фаза. Македонската репрезентација ќе игра со Данска, со Израел и со Кипар, а покрај нас, во групата „А“, турнир ќе организираат и Данците. Хрватска, Австрија, Унгарија и Луксембург ќе ги одмерат силите во групата „Б“.
Македонија сега ќе има шанса на домашен терен да игра за првото злато во Европската лига откако досега освои три сребрени медали во 2015, 2016 и 2017.
sportmedia.mk