Градските ривали, МЗТ Скопје и Работнички продолжуваат со пеколниот ритам. И двата тима на два дена ги одигруваат заостанатите мечеви кои им се насобраа поради АБА 2-обврските во изминатиот период.
На ред дојде меѓусебната пресметка за Скопје, а домаќин на дербито број 154. е тимот од Аеродром. Не е далеку нивниот дуел во второлигашкото јадранско натпреварување. Пред речиси месец и пол, МЗТ Скопје излезе како победник со 84-82. Работнички имаше двоцифрена негатива во третата четвртина, но и покрај успеа да се врати во игра, на крајот остана без бодовите.
Избраниците на Димитар Мираковски не го заборавија поразот, на овој натпревар ќе влезат со голема самодоверба, зад себе имаат серија од пет победи во низа, вкупно 11 сезонава. Тимот од „Градски парк“ е на осмото место на табелата, додека пак на другата страна МЗТ Скопје има една победа помалку и се наоѓа на десетата позиција.
По болниот пораз во Гостивар, Дарко Радуловиќ и неговите момци врзаа два триумфи и покрај тоа што имаат проблеми со повредите.
Работнички има добиено 90 меча, додека МЗТ Скопје славеа на 63.
Последните три средби меѓу градските ривали беа навистина тесни, вакво сценарио се очекува и денеска во 16 часот.
Во истиот термин силите ќе ги одмерат Еуроникел и Куманово.
sportmedia.mk