Абубакер Ес Саххал не е веќе член на Шкендија. Оваа вест е потврдена и од самиот клуб. Нешто што беше очекувано, но нешто што требаше да се случи барем неколку дена порано, а не во пресрет на гостувањето во Кратово.
Инаку Ес Саххал кој е по потекло од Мароко, а има француски пасош, при неговото доаѓање во ланскиот зимски преоден рок, беше најавен тогаш како мега засилување. Младиот офанзивец, кој има играно и за младите селекции на “галските петли“ беше донесен во Шкендија да биде иднината на овој клуб. Да ги искаже сите свои квалитети а потоа и да биде продаден, така тоа го прават клубовите кои знаат што сакаат или знаат како тоа да го работат во фудбалот.
Според некои шпекулации за Ес Саххал клубот платил и цели 50.000 евра само за отштета, секако дека тука не ја сметаме и баснословната плата за самиот играч која ја земал во Шкендија.
Така да сумата би одела и до 100.000 евра, што за наши услови е сума која воопшто не е мала, па макар станува збор и за клуб кој има богат газда, како Шкендија.
Реално уште кога дојде се виде дека Ес Саххал е далеку од мега – засилување, му се даваше шанса, но тој таа шанса не ни знаеше, а не ни можеше да ја искористи. Лимитирани беа тие негови “мега – квалитети“.
И беше јасно дека разделбата е при крај.
А замислете барем 30% од тие пари што беа дадени за Ес Саххал да му се дадоа на Енур Тотре за оваа година.
Замислете…
Но тоа е друга “приказна“, приказна која Шкендија може да ја чини многу, многу…пари.
sportmedia.mk