Младиот македонски фудбалер Георг Стојановски продолжува да ги освојува симпатиите на навивачите во Бугарија со своите одлични настапи во дресот на Спартак Варна.
22-годишниот напаѓач беше еден од клучните играчи во големата победа на Спартак на вчерашното гостување кај Монтана со 2:0, во важен натпревар од бугарската efbet Лига. Стојановски го отвори резултатот во 25. минута, покажувајќи голгетерски инстинкт и одлична реакција пред противничкиот гол.
Со оваа победа, тимот од Варна останува во жестока борба за опстанок во бугарската елита, а македонскиот интернационалец сè повеќе се наметнува како едно од најважните имиња во офанзивата на клубот. Спартак Варна е клуб со богата традиција и голема навивачка база во Бугарија, кој настапува во најсилното бугарско фудбалско првенство – efbet Лига.
Бугарските медиуми сè почесто го издвојуваат младиот Стојановски како еден од најперспективните фудбалери во тимот, но и во целата лига. „Херој на тимот беше нашиот напаѓач Георг Стојановски“, пишуваат дел од медиумите по последниот триумф на Спартак.
Младиот Македонец сезонава има учинок од шест гола и четири асистенции, со што се вбројува меѓу најдобрите офанзивни играчи на Спартак Варна. Покрај континуитетот и зрелоста што ги покажува на теренот, Стојановски е и еден од лидерите на тимот според директното учество во голови.
Неговите настапи потврдуваат дека пред него стои сериозна фудбалска иднина, а со брзината, движењето и чувството за гол, Стојановски полека прераснува во еден од омилените играчи на навивачите во Варна и важен адут на тимот во клучниот дел од сезоната.
© Vecer.mk, правата за текстот се на редакцијата
