Случајот со наводното барање поткуп за вработување во Противпожарната бригада на Град Скопје заврши со апсење на вработен во Службата за општи и заеднички работи на Владата. Димитар Цингаровски, кој бил ангажиран како возач за потребите на Генералниот секретаријат, е осомничен дека побарал 1.500 евра од граѓанин за да посредува за негово вработување како пожарникар. На 4 септември тој бил затекнат при примопредавање на 500 евра од побараната сума, кои претходно биле обележани, по што бил лишен од слобода. Од Владата велат дека случајот бил пријавен како барање поткуп, а акцијата била реализирана во соработка со службите на МВР.
Од Владата нагласуваат дека Цингаровски во моментот на настанот ги извршувал работните задачи како возач за потребите на Генералниот секретаријат, но претходно засновал работен однос во СОЗР, по постапка каква што се применува и за останатите вработени во службата.
„Целата акција е дел од заложбите на Владата за бескомпромисна борба против корупцијата“, наведуваат од Владата, додавајќи дека случајот покажува оти законите важат за сите, без оглед на работната позиција.
Од Владата посочуваат дека случајот е пример за соработка меѓу институциите во насока на откривање и санкционирање на коруптивни дејствија.
За Цингаровски е определен 30-дневен притвор, а натамошната постапка ќе треба да утврди дали и за каква одговорност постојат докази.
© Vecer.mk, правата за текстот се на редакцијата
