Премиерот Зоран Заев денеска од Штип уште еднаш ја коментираше трагедијата во тетовската модуларна болница и рече дека од неа се извлечени поуки, како и дека во моментов се прават контроли на сите такви објекти во земјава.
- Тагата и болката се големи, но трагедии се случуваат насекаде. Веднаш презедовме чекор што мислам треба да преземе и во иднина да не дозволиме да се случуваат вакви трагедии. И оваа трагедија има поуки, се прават дополнителни контроли на сите модуларни болници низ земјава, и веројатно долг период пред нас ќе бидат предмет на испитување на ваквите болници. Тоа се болници за згрижување на пациенти. Сите треба да учиме од слабостите на системот, трагедиите треба да ги прифаќаме како трагедии со најобјективни претпоставки и најобјективни очекувања и испитувања за нивната причина, истакна Заев и додаде дека никој не е венчан за функцијата, како и дека секој е заменлив.
- Никој не е венчан за функцијата, секој е заменлив, но не треба веднаш да си даде оставка затоа што некој тоа го бара. Оставам експертите да ги кажат сите детали околу трагедијата, тоа го чекаме сите“, рече Заев.
