Вистински шок овие денови доживуваат десетици лица кои се членови на позната македонска банка откако нивното салдо го испразниле хакери. Последниот ваков случај го доживеал и 33-годишен скопјанец кому вчера кога сакал да подигне пари од банкомат не му успеало. Имено, на екранот пишувало дека не може да се подигне сума, бидејќи веќе е направена трансакција од 30 илјади денари.
Тој во изјава за КУРИР вели дека веднаш заминал во банката каде дознал дека бил мета на хакерска измама.
- Во банката ми кажаа дека во неделата од банкомат во Штип од мојата картичка биле подигнати 30 илјади денари иако јас сум од Скопје и за време на викендот бев дома, ниту ја имав дадено некому мојата картичка која ми е во паричникот. Од службите таму ми кажаа дека не сум единствен и дека парите целосно ќе ми бидат вратени во наредните неколку дена, раскажува тој за агонијата која ја поминал.
Ова младо момче додава дека денеска од банката му потенцирале дека не е единствениот кој овој викенд бил мета на хакерски напад и преку неговата картичка да изнудат поголема сума на пари.
- Истото им се случило на поголем број на македонски граѓани, но од банката не сакаа да ми ја откријат бројката, вели тој за Курир и додава дека за овој случај треба да се информираат сите граѓани се со цел да внимаваат на честите измами особено во денешно време кога има експанзија на хакери и вакви напади.
