Денеска продолжуваат протестите на ВМРО-ДПМНЕ со кои партијата бара власта да објави јавно за што преговара со Бугарија и дали веќе е прифатена бугарската декларација.
Од партијата велат дека протестите продолжуваат затоа што Заев и Бујар Османи кријат за што се преговара и што се’ се подготвени да прифатат од бугарската декларација.
На седницата на Извршниот комитет одржана викендов во Битола, донесена е одлука за продолжување на протестите, поради како што информираат од партијата, спречување на националниот срам кој и се подготвува на Македонија од страна на Зоран Заев и неговите соработници.
ВМРО-ДПМНЕ го повикува министерот за надворешни работи Бујар Османи да го покаже на македонската јавност документот кој го преговараат со Зоран Заев.
-Се додека на тајни преговори се подриваат македонските национални интереси, ВМРО-ДПМНЕ ќе продолжи да протестира заедно со граѓаните на Република Македонија. Протестите продолжуваат утре од 17:00 часот пред МНР во Скопје, истакнаа вчера од ВМРО-ДПМНЕ.
