Во текот на вчерашниот ден и денеска истражните тимови на Јавното обвинителство и Министерството за внатрешни работи координирано преземаат дејствија за обезбедување докази во истрагата во врска со трагичниот пожар во Кочани.
Според информациите, тие утрово направиле претрес во канцелариите на Државниот пазарен инспекторат во Кочани и Виница.
Во рамки на увидот што бил направен во Кочани, службените лица прибирале доказни материјали поврзани со трагичниот пожар во дискотеката „Пулс“, а сличен претрес е направен и во Виница, со оглед што од таму се поранешниот и актуелниот раководител во Одделението за инспекциски надзор во Штип, кое е надлежно за градовите во Источниот регион.
Во меѓувреме, активности за контрола на работата на угостителските и други објекти во Кочани од утрово преземаат и општинските инспекциски служби, главно во Трговскиот центар каде што се наоѓа другиот, сега веќе искршен, угостителски објект на сопственикот на дискотеката „Пулс“.
Државното Јавно обвинителство соопшти дека се извршени претреси на пет локации во Кочани и во Скопје, при кои се одземени дополнителни електронски уреди и други докази за кои се издадени наредби за вештачење.
© Vecer.mk, правата за текстот се на редакцијата
